Maskinteknikk - kurskode FTT045H

Fordjupingsområdet maskinteknikk utdannar fagteknikarar som skal kunne ta ansvar for konstruksjon og utvikling av produksjonsprosessar. Fordjupingsfaga tek for seg prosjekt- og kvalitetsstyring, verkstadteknisk automatisering, data-assistert konstruksjon (DAK) og tilverkings- og konstruksjonsteknikk.

Maskinteknikk er eit allsidig fagområde med spennande faglege utfordringar. Ei maskin kan bestå av mekaniske, hydrauliske, pneumatiske og elektroniske komponentar, gjerne i kombinasjon med kvarandre. Teknisk fagskule innan maskinteknikk kan gje deg høve til å få ei rekkje jobbar innan landbasert industri og offshore.  

Fullført utdanning kvalifiserer til stillingar som driftsassistent, rasjonaliseringsteknikar, driftsleiar, konstruktør, driftsteknikar, vedlikehaldsteknikar, verksmeister, planleggjar, formann, kalkulatør, kontrollteknikar, faglærar i vidaregåande skule m.m.