Stordmodellen ved Fagskulen Vestland vann utdanningskvalitetsprisen

Samarbeid om verdiskaping, innovasjon og kompetanse - ein modell for framtidas fagskule

Stordmodellen bygger på eit langvarig og målretta samarbeid mellom Fagskulen Vestland og industrimiljøet på Stord, med Aker Solutions i spissen. Modellen gir fagarbeidarar eit skreddarsydd utdanningstilbod som både er praksisnært og relevant, samstundes som regionen får tilgang på kritisk teknisk kompetanse i ei tid prega av grøn omstilling og endra produksjonsvilkår.

Kjernen i modellen er den tette integrasjonen av teori og praksis. Gjennom eit samlings- og rotasjonsopplegg kan tilsette kombinere studium ved Fagskulen med arbeid og oppgåver direkte knytt til utfordringar i eigen bedrift. Industrien bidreg med fleksible arbeidstidsordningar og økonomisk støtte, noko som gjer det mogleg for erfarne arbeidstakarar å vidareutdanne seg utan å miste fotfeste i arbeidslivet.

Prisen vart delt ut av Forskings- og høgare utdanningsminister Sigrun Aasland, under Fagskulekonferansen i Oslo, som samlar representantar frå heile fagskulesektoren i Norge.

I juryen si grunngjeving heiter det mellom anna:

«Stordmodellen bidrar til fremragende, oppdatert og yrkesrettet høyere yrkesfaglig utdanning. Tiltaket representerer et innovativt og svært vellykket samarbeid mellom utdanning og industri, som styrker kompetanse, verdiskaping og regional utvikling. Modellen er utviklet for å møte konkrete behov i industrien, samtidig som den gir fagarbeidere mulighet til videreutdanning uten å forlate arbeidslivet. Deltakelse i dette tiltaket gir også studentene en mer sikker jobb og fører til at de kan stå lengre i arbeidslivet.

Høy pedagogisk kvalitet gir svært gode resultater både for studenter og arbeidslivet. Fagskolens robuste modell tåler både endrede krav fra arbeidslivet og skiftende konjunkturer.

Tiltaket oppfyller vurderingskriteriene på en fremragende måte.»

Nøgd rektor

Rektor Torbjørn Mjelstad tok imot prisen på vegner av Fagskulen Vestland, og uttrykte stor glede over utmerkinga.

– Vi er stolte over at arbeidet vårt blir lagt merke til nasjonalt, seier Mjelstad. Han understrekar at Fagskulen Vestland har eit kontinuerleg fokus på utdanningskvalitet, og at målet er å vere den føretrekte tilbydaren av kompetanse til arbeidslivet i Vestland. Ifølgje Mjelstad er tett og vedvarande dialog med arbeids- og næringslivet i regionen heilt avgjerande for å kartleggje reelle kompetansebehov og utvikle utdanningar som er direkte relevante for arbeidslivet.

– Stordmodellen er eit resultat av mange år med målretta arbeid for å gjere læring relevant, praksisnær og framtidsretta. Prisen er ei anerkjenning til både tilsette, studentar og samarbeidspartnarar, seier han.

Styreleiar Oddmund Klakegg er også særs nøgd med tildelinga.

– Denne prisen syner at modellen vi har rundt samarbeid med arbeidslivet i Sunnhordland treffer godt til visjonen  til fagskulesektoren. Vi leverer fersk kompetanse rett inn i det verdiskapande norge, seier Klakegg.

Om prisen

Utdanningskvalitetsprisen for høgare yrkesfagleg utdanning blir delt ut årleg av Direktoratet for høgare utdanning og kompetanse (HK-dir). Prisen, som er på 1 million kroner, skal påskjøne framifrå arbeid med utdanningskvalitet i norsk høgare yrkesfagleg utdanning og stimulere sektoren til systematisk arbeid med å vidareutvikle kvaliteten.