Barn og unge si psykiske helse

Psykiske plager og lidingar blant barn og unge er eit aukande samfunnsproblem, og tidleg innsats er avgjerande. Barnehagar, skular og andre tenester har ei viktig rolle i å fremje trivsel, meistring og inkludering. Vidareutdanninga Barn og unge si psykiske helse skal bidra til å styrkje fagkompetansen i dette arbeidet, og gir kunnskap om korleis ein kan forstå, førebyggje og møte psykiske utfordringar og åtferd som krev særleg merksemd.

Vidareutdanninga Barn og unge si psykiske helse gir ei brei og oppdatert forståing av psykisk helsearbeid retta mot barn og unge. Gjennom studiet får du innsikt i psykiske lidingar hos barn og ungdom, utviklingspsykologi, førebyggjande og helsefremjande arbeid, tverrfagleg samarbeid, samtaleverktøy i relasjonelt miljøarbeid og korleis ein kan arbeide med det psykososiale miljøet rundt barn og unge.

Eit sentralt tema i studiet er korleis ein kan forstå og møte barn og unge som har åtferd som utfordrar, og korleis ein kan fremje tryggleik, meistring og utvikling gjennom relasjonsbygging og målretta miljøarbeid.

Studiet er praksisnært og legg vekt på refleksjon, etikk og relasjonskompetanse i møte med barn, unge og deira familiar.

Utdanninga i Barn og unge si psykiske helse kvalifiserer mellom anna til arbeid innan kommunale oppvekst-, helse- og omsorgstenester, som til dømes skular, barnehagar, barnevernsinstitusjonar, fritids- og aktivitetstilbod og andre tenester retta mot barn, ungdom og familiar.

Kompetansen er særleg relevant for fagarbeidarar og andre som arbeider med psykisk helsearbeid, miljøarbeid, førebyggjande helsearbeid og oppfølgingstenester i kommunen.
Ho er nyttig på fleire nivå i tenestene og kan gi moglegheit for nye ansvarsområde og vidare fagleg utvikling.

Studiet består av fire emne à 15 studiepoeng, som samla gir 60 studiepoeng. Det er eit deltidsstudium over to år, og blir gjennomført nettbasert med samlingar.
Det er høve til å ta einskildemna kvar for seg. Arbeidsmåtane vil variere mellom digitale førelesingar, grupperefleksjonar, oppgåver, praksisnære case, workshop og rettleiing og erfaringsdeling med meir.

Alle helsefaglege utdanningar ved Fagskulen Vestland krev politiattest, jf. Lov om høgare yrkesfagleg utdanning (fagskulelova) §27. Politiattesten skal visast fram ved studiestart.
Vi ber om at de ikkje sender inn politiattestar på e-post, då dette kjem i konflikt med gjeldande lov om personvern.

Skulen gjennomfører skikkavurderingar jf. Fagskulelova §26.

Du kan søkje studieplass på grunnlag av
fullført og bestått vidaregåande opplæring med relevant fagbrev som:

• barne- og ungdomsarbeidar
• helsefagarbeidar
• hjelpepleiar
• omsorgsarbeidar
• ambulansearbeidar
• tannhelse-/helsesekretær (med to års relevant praksis)
• aktivitør

• realkompetanse

Realkompetanse
Søkjarar som ikkje har fagbrev, og som har fylt 23 år, kan søkje opptak på grunnlag av realkompetanse.
Realkompetanse er all relevant kompetanse ein person har skaffa seg gjennom utdanning, yrkeserfaring og deltaking i organisasjonar eller liknande.

Studiet er deltid, nettbasert med samlingar (Bergen).
Det er mogleg å følgje samlingane digitalt frå næraste studiestad, dersom det er nok søkjarar som ønskjer å samlast der.
Fagskulen Vestland har studiestadar i Bergen, Førde, Måløy, Stord, Austevoll, Voss og Hjeltnes.