Milliondryss til fagleg utvikling ved Fagskulen Vestland!

Bransjeprogram:  

Kvart år lysar HK-dir ut midlar til kompetanseutvikling for ulike bransjar. Dette er eit treparts samarbeid mellom staten, arbeidsgivarar og arbeidstakarorganisasjonar, kor målet er å gi arbeidarar ny og relevant kompetanse gjennom korte og fleksible kurs/utdanningar. Ordninga lar fagskular og andre søke pengar til både utvikling og gjennomføring av utdanningarinnanfor definerte områder. I årets søknadsrunde fekk Fagskulen Vestland gjennom 11 søknader med ein samla løyving på nesten 14 millionar kronar. 

Prosjekta skulen har fått midlar til, spenner vidt innanfor mange fagområde. To prosjekt er på helse, resten er innanfor tekniske fag. Fire prosjekt er i samarbeid med Aker Solutions på Stord, og gir oss moglegheit til å utvide og utvikle tilbodet innanfor Stord-modellen. Elles er det knytt mange nye samarbeid for utvikling, både innanfor privat næringsliv og offentleg og privat helsevesen. Vi beveger oss og inn på nye fagområde med eigne bransjeprogram for biogass, hydrogen og ammoniakk.  

Det kom inn 167 søknader, ein vekst på 20 prosent frå i fjor. Det vart tildelt midlar til 76 prosjekt. Fagskulen Vestland hadde 7 prosent av søknadane, fekk 14 prosent av tildelingane og 10 prosent av midlane. Dette er vi veldig nøgde med.  

Det er EVU-avdelinga som held i bransjeprogramma. Alle dei nye prosjekta har fått midlar til utvikling og to gjennomføringar, og alt må vere ferdig innan november 2027. I tillegg er avdelinga no godt i gang med gjennomføring av dei fire bransjeprogramma skulen fekk tildelt i fjor. Desse skal og vere ferdig innan november 2027. Dette betyr høgt trykk på både utvikling og gjennomføring det neste halvanna året.  

Utviklingsmidlar: 

I tillegg har Fagskulen Vestland fått gjennomslag for sju ulike utviklingsprosjekt i årets tildeling av Utviklingsmidlar for høgare yrkesfagleg utdanning. Prosjekta omfattar utvikling av nye utdanningstilbod og investering i moderne undervisningsutstyr, til kompetanseheving for lærarar og styrking av internasjonalt samarbeid. Til saman er 12,5 millioner kroner tildelt skulen, og vi er med det igjen blant skulane med størst tildeling til flest prosjekt. 

Blant dei nye satsingane er ei ny utdanning for droneoperatørar retta mot landbruk og beredskap som skal etablerast i Førde, samt eit studiepoenggivande tilbod i rettleiing av lærlingrettleiarar som helseavdelinga skal ha ansvar for. Begge utdanningane skal bli utvikla i tett samarbeid med arbeidslivet og svarar på konkrete behov for meir spesialisert kompetanse.  

Skulen får òg midlar til investering i utstyr som styrkjer den praksisnære undervisninga. Vi skal investere i ein trefaseseparator til prosessteknikk, og vi skal etablere ein moderne simuleringslab for helseutdanningane på Nordnes.  

Vidare omfattar tildelinga kompetanseheving for lærarar ved alle våre maritime studiestadar, samt utvikling av ei felles pedagogisk plattform for heile Fagskulen Vestland. Plattformprosjektet skal styrkje kvalitet, samanheng og berekraft i dei mange nett- og fleksible studietilboda, og leggje til rette for systematisk deling av god pedagogisk praksis.  

Det sjuande prosjektet handlar om å utvikle eit nytt program for studentmobilitet som gir studentane våre moglegheit til å få internasjonal erfaring. Dette er særleg viktig i eit stadig meir globalisert arbeidsliv, der slik kompetanse blir stadig meir etterspurd. 

Samla sett gir tildelingane gjennom Bransjeprogrammet og Utviklingsmidlar viktige løft for Fagskulen Vestland, studentane våre og samarbeidet med arbeidslivet i regionen.