Demensomsorg og psykisk helsearbeid til eldre
Demens og psykiske lidingar hos eldre er aukande og stiller store krav til kompetanse i helse- og omsorgstenestene. Denne fagskuleutdanninga gir deg kunnskap og ferdigheiter til å forstå, førebyggje og møte utfordringar knytte til demens og psykisk helse hos eldre på ein trygg, fagleg og respektfull måte. Gjennom studiet lærer du om personsentrert omsorg, kommunikasjon, miljøbehandling og handtering av utfordrande åtferd. Du får òg innsikt i korleis etisk refleksjon, tverrfagleg samarbeid og målretta miljøarbeid kan bidra til meistring, livskvalitet og verdig omsorg for eldre menneske. Studiet passar særleg for deg som arbeider innan helse- og omsorgstenestene og møter eldre med demens, kognitiv svikt eller psykiske lidingar.
- Varigheit:
- 1 år
- Utdanningsform:
- Deltid, nett- og samlingsbasert
- Studiepoeng:
- 30 Fagskulegrad (kan takast som enkeltemne à 7,5 studiepoeng)
- Søknadsfrist:
- Neste oppstart:
- Haust 2026
- Studieplan:
- Studiestad:
- Bergen
Viktig kompetanse
I dette studiet tileignar du deg kunnskap og verktøy for å legge til rette for god livskvalitet for enkeltmenneske med ei rekke ulike behov og føresetnader.
Vidareutdanninga gir ei brei og praksisnær forståing av demensomsorg og psykisk helsearbeid retta mot eldre.
Gjennom studiet får du kunnskap om demenssjukdommar, alderspsykiatri, personsentrert omsorg, kommunikasjon, kartlegging, miljøbehandling og utforming av målretta tiltak. Studiet tek utgangspunkt i pasienten sin livshistorie, ressursar og individuelle behov, og viser korleis relasjonar og miljø påverkar meistring og livskvalitet.
Eit sentralt tema i studiet er førebygging og handtering av utfordrande åtferd, inkludert bruk av VIPS-praksismodellen, tillitsskapande tiltak og førebygging av tvang og makt. Etikk, refleksjon, fagleg rettleiing og arbeidshelse er gjennomgåande tema.
Utdanninga er arbeidslivsrelevant og utvikla i tråd med behova i tenestefeltet. Ho gir kompetanse i samsvar med læringsutbytte på nivå 5.1 i Nasjonalt kvalifikasjonsrammeverk (NKR).
Kompetanse og jobbmoglegheiter
Utdanninga kvalifiserer til arbeid innan kommunale helse- og omsorgstenester, som til dømes sjukeheim, heimetenester, omsorgsbustader, dagsenter og demensteam.
Kompetansen er særleg relevant for fagarbeidarar og andre tilsette som arbeider med eldre menneske med demens eller psykiske lidingar. Studiet kan gi grunnlag for auka fagleg ansvar, utviklingsoppgåver og vidare profesjonell utvikling i tenestene.
Oppbygging og arbeidsmåtar
Studiet består av fire emne à 7,5 studiepoeng, som samla gir 30 studiepoeng. Det er eit deltidsstudium over eitt år, med to emne i haustsemesteret og to emne i vårsemesteret.
Kvart emne kan takast enkeltvis, og det er inga fast rekkjefølgje mellom emna. Emne 4 inneheld utviklingsarbeid og ferdigheitstrening, som fortrinnsvis kan gjennomførast på eigen arbeidsplass dersom denne er relevant.
Arbeidsmåtane varierer mellom samlingsbasert undervisning, digitale førelesingar, refleksjonsoppgåver, gruppearbeid med rettleiing, praksisnære case og sjølvstudium. Den nettbaserte undervisninga er hovudsakleg asynkron og tilrettelagd for studentar som kombinerer utdanning og arbeid.
Skikkavurdering
Det blir gjennomført skikkavurdering gjennom heile studiet, jf. fagskolelova § 26. Skikkavurderinga skal sikre at studenten har nødvendige føresetnader for å kunne utøve yrket på ein trygg og forsvarleg måte overfor menneske i sårbare livssituasjonar.
Opptak
Dette studiet har krav om arbeidserfaring i tillegg til fagbrev. Du må ha minimum eitt års erfaring frå stilling i 50 % frå arbeidsfeltet demensomsorg eller psykisk helsearbeid til eldre.
Du kan søke studieplass dersom du fyller kravet om arbeidserfaring og har dokumentasjon på
- fullført og bestått vidaregåande opplæring med relevant fagbrev i:
- helsearbeidarfaget
Realkompetanse
Manglar du fagbrev, men har fyllt 23 år og har relevant erfaring, då kan du søke om opptak med realkompetanse.
Helsefagleg utdanning med autorisasjon (sjukepleiar/vernepleiar) er utdanningar som vil fylle kravet om realkompetanse.
Last ned skjema for eigenvurdering av realkompetanse her.
Bli student
Spørsmål?
Servicetorget har telefontid mellom kl. 10:00 og 14:00 på kvardagar.
Tlf.: 55 33 78 00
E-post: fagskulenvestland@vlfk.no