Teamleiing i helsetenesta

Etter fullført utdanning kan du ta ansvar for leiing, prioritering av ressursar, oppfølging og kvalitetssikring i helse- og omsorgstenestene. Du kan bidra til strategisk planlegging, utviklingsarbeid og vere ein ressurs i forbetringsprosessar som fremjar både pasienttryggleik og gode arbeidsvilkår. Målet er å gi deg auka meistring og handlingskompetanse som teamleiar, slik at du kan bidra til høg kvalitet i tenestene.

Utdanninga er forankra i nasjonale føringar, mellom anna gjennom rapporten Tid for handling, som peikar på utfordringar knytt til ressursknappheit, aukande kompleksitet og behov for tydlegare prioriteringar og oppgåvedeling. Teamleiarrolla sitt ansvar for effektiv ressursbruk, passande oppgåvedeling og koordinering av arbeid i tverrfaglege team er derfor vektlagt i utdanninga.

Utdanninga består av tre emne på 5 studiepoeng, totalt 15 studiepoeng.
Utdanninga er fleksibelt tilrettelagt som deltidsstudium, og kan kombinerast med full jobb. Utdanninga inneheld ikkje praksis.

Kunnskap, ferdigheiter og generell kompetanse blir utvikla gjennom refleksjonsbaserte læringsaktivitetar, mellom anna arbeid med eigne case frå yrkesutøving di, arbeid med refleksjonsnotat, rettleiing og faglege refleksjonar.

Fleksibel emnestruktur: Emna kan takast enkeltvis, og du får karakterutskrift etter kvart fullførte emne. Emna kan også kombinerast og byggast saman til eit samla studieløp på 15 studiepoeng: Teamleiing i helsetenesta. Studieløpet utgjer ikkje ei full fagskuleutdanning, men gir formell kompetanse på fagskulenivå.

Du kan søke studieplass dersom du har dokumentasjon på fullført og bestått vidaregåande opplæring med relevant fagbrev.

Sjå liste  over fagbrev her.

Opptak på grunnlag av realkompetansevurdering

Søkjarar som ikkje fyller dei generelle opptakskrava, og som har fylt 23 år, kan søke om opptak på grunnlag av realkompetanse.

Les meir om realkompetanse

Utdanninga er gratis.