Bruk av kunstig intelligens (KI) ved Fagskulen

Fagskulen er eigd av Vestland fylkeskommune. Alle studentar ved fagskulen kan nytte fylkeskommunen sine godkjente KI-verktøy. At eit KI-verktøy er godkjent, inneber at fylkeskommunen har gjort grundige risikovurderingar og ei kvalitetssikring knytt til personvern, datasikkerheit og informasjonstryggleik. Desse vurderingane tryggjar at verktøya oppfyller gjeldande lovverk og er eigna for bruk i undervisning og studiearbeid. Bruk av desse KI-verktøya via institusjonell innlogging sikrar at data ikkje vert brukte til å trene modellar vidare, og at dei ikkje vert delte med tredjepartar. 

Du kan lese meir om dei ulike verktøya og finne direkte lenkjer her. Ein kort oversikt finn du under:

Godkjende verktøy:

1. Sikt KI

2. NotebookLM

3. Gemini

4. M365 Copilot

5. NDLA praterobotar

Hugs å logge inn med studentkontoen din (VLFK-konto)!  

Dersom emnet opnar for at KI-verktøy er tillate hjelpemiddel, kan du til dømes nytte det til:

• Idemyldring og struktur: Få forslag til disposisjon, tema eller struktur til det skriftelige arbeidet ditt.

• Språkvask og korrektur: Forbetre språket, sjekke grammatikk og rette skrivefeil i tekst du har skrive sjølv.

• Forklaring av fagstoff: Få forenkla forklaringar eller døme på vanskelege omgrep og teoriar.

• «Sparringspart» og tilbakemelding: Teste ut eigne argument og få innspel til korleis teksten din kan bli betre.

Du kan ikkje bruke KI til å:

• Det du leverer, skal vere eit resultat av di eiga tenking og innsats. Du kan difor ikkje presentere tekst frå KI som ditt eige arbeid (la KI skrive innleveringa/oppgåva di for deg). 

• Ikkje bruk KI som eit oppslagsverk. Vis alltid til dei faktiske kjeldene. KI-verktøy kan produsere feilaktig informasjon, misvisande resonnement og dikte opp kjelder som ikkje finst (såkalla hallusinasjonar). Difor er det avgjerande at du alltid forsikrar deg om at det du leverer, held fagleg mål. 

I Noreg er det GDPR på norsk kalla personvernforordninga som regulerer personvernet. Dette er eit regelverk vedteke av EU, og det set rammene for korleis personopplysningar kan behandlast, lagrast og brukast. Du finn lova i sin heilskap på Lovdata.

Personopplysningar er all informasjon som gjer det mogleg å identifisere ein person, som namn, fødselsnummer, e-postadresse, telefonnummer, fingeravtrykk eller eit tydeleg bilete. Vær merksam på at opplysningar og kan reknast som personopplysningar, ved at til dømes opplysningar utan namn kan koplast saman med anna informasjon eller bakgrunnskunnskap slik at identiteten kjem fram (indirekte personopplysningar). 

Personvernregelverket gjeld ved bruk av KI. Sjølv med institusjonsinnlogging er det ein risiko for at opplysningar kjem på avvegar. Vestland fylkeskommune understrekar derfor at ein ikkje i nåkre høve skal leggje inn personopplysningar i samband med bruk av dei godkjente KI-verktøya.  

Du må respektere opphavsretten når du brukar KI-verkøy. Det å laste opp låste artiklar eller verna materiale i eit KI-verktøy kan føre til at innhaldet vert spreidd eller brukt til å trena modellen. Dette kan gjere stoffet tilgjengeleg for andre eller byggje det inn i modellen, noko som bryt opphavsretten og kan få juridiske og økonomiske følgjer for deg. 

Språkmodellar er avanserte statistiske verktøy. Når ein modell genererer tekst, reknar han kontinuerleg ut kva ord (eller token) som er mest sannsynleg at følgjer etter det førre, basert på mønster i treningsdataa sine.

Når modellen manglar nok data, eller prøver å svare på noko han ikkje har dekning for, fyller han ut hola med noko som kunne ha vore sant. Språkmodellen "tippar", og han gjer det med ein skråsikkerheit som gjer det vanskeleg å skilje mellom fakta og fiksjon. Dette blir kalla "hallusinasjon".